.

SIÑA NOS MUCHANAN E SPIRAL DI KREASHON FOR DI UN EDAT HOBEN

 

 

ELABORA RIBA SILENSIO             DESEA

- duna e alumno e oportunidat pa e ta silensioso. Lagele eksperensiá forsa i trankilidat di silensio. Papia ku ne tokante di silensio den diferente situashon: ora e ta drumi; den misa; den klas; den mondi; den kushina; pa un baby; den biblioteka; den avion.  Laga e alumno bini ku mas ehempel. Papia ku nan tokante silensio den nan mente. Laga nan investigá kon importante silensio ta pa e otro alumnonan.

- mientras ku e ta den e silensio e por  wordu guiá pa e puntra su mes i sinti for di su paden, su kurason, kiko ta su DESEO i kiko ta hasié kontentu di berdat. E loke ku ta hasi un mucha kontentu di berdat, hopi bia ta trese un smile suave i bunita riba su kara. Hinter su kurpa ta relahá i e por kuminsá move bai bini di entusiasmo. Esaki ta sosodé pasobra su energia i gana di biba i ekspresá su mes  ta aktivá

(Hasi nan konsiente di kiko ta nifiká si silensio i deseo no ta eksistí)

IMAGINA

- Imaginá ta nifika: krea imagen di e kos ku e ta deseá. Lagué pensa mas leu: ki koló e kos ku e ta deseá tin; unda e mes ta ora e ta mira e kos o pasa den e kos;  e ta su so, of tin mas hende aserka? Ta friw of kayente? ta mehinta, merdia o anochi? Kiko e ta hasi ku e kos? E kos ta pisá o leve; grof o lizu? Asina tin hopi hopi mas pregunta ku por yuda un mucha imaginá di un forma bibu.

(Hasi e alumnonan konsiente di kiko ta nifiká si imaginashon no ta eksistí)

ELABORA RIBA POSITIVISMO    KERE

Elaborá riba positivismo, ta nifiká ku ora e mucha ta imaginando, e ta visualisá i imaginá tur e kosnan ku ta yuda su imagen bira mas positivo i bunita posibel. Por ehempel ku e hendenan ku e ta huntu ku ne, ta masha kontentu pe, i ku e ta mira nan hari, brasé, duné man, felisité. E ta konsiente di kon e ta sinti su mes den e situashon ei. Asina e ta kuminsá kere ku e kos ta posibel. E ta kuminsá den e eherisio aki ku kere den su mes, E ta KERE ku tin stimashon i apresio pe. E ta kere mas lihé ku e por logra. Yudé sinti i sa ku su entusiasmo ta kontagioso i tambe inspirante. Duné kompliment pasobra e ta habrí pa pasa den e bunita proseso aki. Esei ta un muestra di kurashi. Yudé kere den su mes bunitesa.

(Hasi e alumnonan konsiente di kiko ta nifiká si positivismo i kere den bo mes no ta eksistí)

EKSPRESA

Ekspresá ta nifiká ku e loke e ta sinti i eksperensiá paden, e ta pers/ primi, mandé pafó den eksterior. Yudé hasi esaki, ku su bos, e palabranan ku e ta husa, ku su kurpa o abase di un otro forma di arte, kisas kantando o pa medio di un pintura, poesia, rap ets

(Yuda e alumno komprendé kiko ta nifiká si ekspreshon no ta eksistí)

ELABORA RIBA NETWERK  INVESTIGA

Yuda e mucha pa e puntra su mes ken ta tur e personanan ku ta forma parti di e eksperensia ku e ta sinti den su paden. E por puntra su mes kiko nan kada un su rol ta den e vision ku e tin. Tambe kon e por aserká nan i interkambia ku nan tokante di su deseo. E por INVESTIGA ken ta e personanan ku mas por stimulé enbes di demotivé. 

(Yuda e alumno komprendé kiko ta nifiká si no tin netwerk i si nos no ta investigá)

PLANIA

yudé traha un plan abase di kua e ta bai ehekutá su deseo. Yudé hasi esaki den diferente fase / stap

(Yuda e alumno komprendé porfsa den planiamentu i kiko ta pasa si nos no hasi esaki)

ELABORA RIBA STRATEGIA             DISIDI

Investigá ku e mucha kon e ta aserká kada persona, ki ora e ta investigá kiko i tambe ki sekuensia e ta bai hasi uso di dje. Ora e sa esakinan, e ta DISIDI  ki dia e ta kuminsa  i den kuantu tempu e ke ta kla

(Yuda e alumno komprendé kiko ta nifiká si bo no tin strategia i tampoko desishon)

 

AKTUA

Bini den moveshon, tuma kontakto, ekspresá. Tur esakinan ta involví, kurpa, mente i emoshon. Yuda e alumno reflekshona kon tur e partinan aki di su ser ta aktuando i tambe kon e ta sinti su mes.

(Yuda e alumno komprendé kiko ta nifiká si nos no sa di aktua)

HASI LABOR PERSEVERA

Yudé den su proseso ora e kuminsá aktua / laborá riba su plan. Tambe yudé PERSEVERA. Si via esun ruta, no ta logra, e por ahustá su plan i skohe un otro ruta.

(Yuda e alumno komprendé kiko ta nifiká si nos no sa di perseverá)

RISIBI

Den e proseso lo e risibí yudansa. Yudé pensa un forma autentiko pa e ekspresá su gratitut na esunnan ku a yuda e. Asina e ta forma un netwerk ahinda mas fuerte. Yudé prosesá  desapunto. Esaki tambe ta kos ku por pasa. Yudé kohe su forsa di nobo, despues ku e ekspresa su desapunto (sin duna otro hende falta) Despues e por puntra su mes ki direkshon e ta bai i ken otro por yudé pa e logra su meta.

(Yuda e alumno komprendé kiko ta nifiká si nos no sa kon risibí)

 

ELABORA RIBA EMOSHON                    BALORA

Yudé kohe su forsa bek si e keda desapuntá. Despues ku e ekspresá su desapunto (sin duna otro hende falta), e por puntra su mes ki direkshon e ta bai i ken otro por yudé pa e logra su meta. Ta importante pa e balorá desapunto tambe. Desapunto por duné ahinda mas gana di logra loke ta su deseo

(Yuda e alumno komprendé kiko ta nifiká si no ta eksistí emoshon i si nos no por balorá nada)

RILEKS

Relahá den e proseso i despues di e proseso. Debesenkuando hasi e mente silensioso i relahá hinter su kurpa pa asina bini espasio pa inspirashon nobo.

(Yuda e alumnon komprendé kiko ta nifika si hende no por relahá)

Maak een Gratis Website met JouwWeb